O‘zbekiston Respublikasi Tashqi ishlar vazirligi matbuot xizmati xabar berishiga ko‘ra, 2021-yilning 7-dekabr kuni O‘zbekiston Respublikasi Tashqi ishlar vaziri Abdulaziz Kamilov Shanxay hamkorlik tashkiloti Mintaqaviy aksilterror tuzilmasi (SHHT MATT) Ijroiya qo‘mitasi direktori lavozimidagi missiyasini yakunlayotgan Jumaxon Gʻiyosovni qabul qilgan.

Ta’kidlanganidek, O‘zbekiston tashkilotga a’zo davlatlarning terrorizm, ekstremizm va separatizmga qarshi kurashdagi o‘zaro hamkorligini ta’minlash bo‘yicha SHHTning asosiy organi bo‘lgan MATT faoliyatiga katta ahamiyat qaratmoqda.
Uchrashuvda Abdulaziz Komilov Afg‘onistonni ijtimoiy-iqtisodiy qo‘llab-quvvatlash mavzusiga to‘xtalgan.

“Afg‘onistondagi vaziyatga kelsak, so‘zdan amalga o‘tish vaqti keldi. Qish kelmoqda. Mamlakatdagi vaziyatni beqarorlashtirishga olib kelishi mumkin bo‘lgan gumanitar falokatning oldini olish uchun afg‘on xalqiga real yordam ko‘rsatish juda muhim”, — degan u.
Vazir J.Gʻiyosovning tashkilotni yanada rivojlantirish va SHHTga a’zo davlatlarning vakolatli organlari o‘rtasidagi o‘zaro hamkorlikning ijobiy sur’atini ta’minlashga qo‘shgan shaxsiy hissasini yuqori baholagan.

O‘z navbatida, J.Gʻiyosov o‘z missiyasini muvaffaqiyatli bajarish uchun yaratilgan qulay shart-sharoitlar va SHHT MATT Ijroiya qo‘mitasi faoliyatiga ko‘rsatilayotgan ko‘mak uchun O‘zbekiston tomoniga samimiy minnatdorlik bildirgan.
Ma’lumotlarga ko‘ra, 2022-yil 1-yanvardan SHHT MATT Ijroiya qo‘mitasi direktori lavozimida O‘zbekiston vakili Ruslan Mirzayev faoliyatini boshlaydi.

• Afg‘oniston
• TIV