Afg‘onistonni nazorat qilayotgan “Tolibon” harakati Qozog‘istonda bo‘lib o‘tadigan Shanxay hamkorlik tashkilotining navbatdagi sammitida ishtirok etish niyatida. Bu haqda Afg‘oniston Tashqi ishlar vazirligining bir kun avval virtual formatda bo‘lib o‘tgan ShHT sammiti munosabati bilan qilingan bayonotida aytiladi.

Tolibon mintaqada totuvlik va xavfsizlikka erishish, hamkorlikni kengaytirish maqsadida bunday uchrashuvlarni olqishlashini ta’kidladi. Ular, shuningdek, ShHT sammitining yakuniy deklaratsiyasining erkin, barqaror, birlashgan, urushsiz va narkotiklardan xoli Afg‘onistonni barpo etish qismini qo‘llab-quvvatlashlarini bildirdilar. Bundan tashqari, Afg‘oniston Tashqi ishlar vazirligi afg‘onlarga gumanitar yordam ko‘rsatish va qochqinlarning qaytishiga ko‘maklashishni davom ettirish zarurligini qayd etdi.

Shu bilan birga, Tolibon ularning hukumati inklyuziv emasligi haqidagi da'volarga qo'shilmasligini bildirgan. “Islom Amirligida har xil til, irq va yoʻnalishdagi odamlar bor”, – deyiladi bayonotda.

Kecha Shanxay hamkorlik tashkiloti Davlat rahbarlari kengashining 23-sammiti ShHTga aʼzo davlatlar: O'zbekiston, Xitoy, Rossiya, Qozogʻiston, Qirgʻiziston, Pokiston, Tojikiston, ShHT davlat rahbarlari ishtirokida virtual formatda boʻlib oʻtdi. Eron, Belarus va Mo'g'uliston kuzatuvchi davlatlar, Turkmaniston esa raisning mehmoni sifatida taklif etildi. Afg‘oniston tashkilotda kuzatuvchi maqomiga ega bo‘lishiga qaramay, toliblar sammitga taklif etilmagan.

• Afg‘oniston
• ShHT