Afg‘oniston hukumati Ramazon hayiti munosabati bilan mamlakat qamoqxonalarida hukm o‘tayotgan 400 nafar mahkum ozod qilinishini ma’lum qildi. Bu haqda “ToloNews” nashri xabar berdi.
Qayd etilishicha, Islom amirligi rahbari buyrug‘i bilan Pul-e-Charxi qamoqxonasidan 406 nafar mahkum ozod etilgan. Mamlakat Oliy sudi audit departamenti rahbari o‘rinbosari Abdul Vali Mahmud aytishicha, ozod etilganlarning 338 nafari erkak, 40 nafari ayol va 28 nafari bolalardan iborat.

Sud va yuridik idoralar bilan aloqa bo‘limi boshlig‘i Abdulla Haqiq aytishicha, qamoqda bo‘lgan va hozirda ozodlikka chiqayotganlar nojo‘ya xatti-harakatlari va shariat qoidalarini buzganliklari sababli bu yerga olib kelingan bo‘lgan. Rasmiylar xabariga ko‘ra, boshqa ko‘plab mahkumlarning ham hukmni o‘tash muddatlari qisqartirilgan.

“Biz bu mahbuslarning oila a’zolaridan ularning kelajakda shariat va qonunlarga zid bo‘lgan, jamiyatda korrupsiyaga olib keladigan xatti-harakatlarga yo‘l qo‘ymasliklarini so‘raymiz”, — deyiladi rasmiy bayonotda.

Xabarda qo‘shimcha qilinishicha, Islom amirligi rahbarining farmoni asosida mamlakat bo‘ylab jami 2 mingga yaqin mahkum qamoqxonalardan ozod etilishi kutilmoqda.

• Afg‘oniston
• Tolibon