1992-yil 8-oktyabr kuni Afg‘onistondan Termizga 30 tonnaga yaqin tranzit kirib kelgan. Quritilgan mayiz joylashtirilgan qutilar bojxona tekshiruvidan o‘tkazilgan. Hujjatlarda ko‘rsatilishicha, bu mahsulot sobiq ittifoq davlatlari, Belgiya, AQShdan o‘tib, Kanadaga yetib borishi kerak bo‘lgan.

1992-94-yillarda Surxondaryo viloyati bojxona boshqarmasi boshlig‘i lavozimida ishlagan Xoldor Sherovning shaxsiy arxividan foydalanilgan lavhada aytilishicha, mayiz ortilgan vagonga 13 tonnadan ortiq “gashish” giyohvandlik moddasi 19 tonna mayiz qutilari orasiga yashiringan bo‘lgan.

Bu o‘sha vaqtlar qora bozordagi narxi bilan hisoblanganda 1,3 mlrd AQSh dollarini tashkil etgan.

Mazkur “ish”ni olib borgan iste’fodagi polkovnik Erkin Abdullayev tarixda bunday yirik miqdordagi taqiqlangan moddalar qo‘lga kiritilmagani, amerikaliklar 1992-yilgi Termiz voqeasini “Ginness rekordlari kitobi”ga kiritishni va’da berganini bildirgan.

“Afsuski, bu quruq gap bo‘lib qolib ketgan”, – deydi sobiq xodim.

1994-yilda xalqaro tashkilotlar va OAV vakillari ishtirokida 13 tonna gashish yoqib yuborilgan.

• Afg‘oniston
• Bojxona
• Giyohvandlik
• Termiz