Amerikaning Oklaxoma shtatida yashovchi afg‘onistonlik fuqaro 5-noyabr saylov kuni terrorchilik guruhi nomidan terakt uyushtirishni rejalashtirgani uchun hibsga olindi, deb xabar bermoqda AQSh Departamenti.

“Adliya vazirligi bugun Oklaxoma shtatida istiqomat qiluvchi afg‘on fuqarosiga qarshi “Islomiy davlat” nomidan AQShda saylov kuni hujum uyushtirishga til biriktirganlikda ayblov e’lon qildi”, — deyiladi departament bayonotida.

Qayd etilishicha, 27 yoshli Nosir Ahmad Tavhediy terrorchi tashkilotga moddiy yordam ko‘rsatishga uringan, AQSh hududiga hujum uyushtirish uchun qurol sotib olgan, shuningdek, hujumni o‘zi ham amalga oshirishni rejalashtirgan. Huquq-tartibot idoralari uning ismi oshkor etilmagan kichik sherigini ham qo‘lga olgan.

“Endilikda mazkur shaxs terrorchi tashkilotga yordam bergani uchun 20 yilgacha va jinoyat sodir etish maqsadida qurol olgani uchun 15 yilgacha ozodlikdan mahrum etilishi mumkin”, deya ta’kidlaydi Adliya vazirligi.

• AQSh
• Afg‘oniston
• Terakt