Afg‘onistonlik talabalar o‘qishni davom ettirish uchun Termizga qaytib keldi.  

“Sputnik”ning Termizdagi Afg‘oniston fuqarolarini o‘qitish ta’lim markazi direktori Oybek Ro‘ziyevga tayanib xabar berishicha, qo‘shni davlatdan 134 nafar talaba Termizga qaytib kelgan.  

“Afg‘onistondan 134 nafar talaba o‘qishni davom ettirish uchun kelgan. Kayfiyatlari a’lo. Ta’tildan keyin o‘qishga kirishadi”, – deydi Oybek Ro‘ziyev.  

Termizda afg‘on talabalari ikki mutaxassislik – o‘zbek tili va adabiyoti o‘qituvchisi hamda temir yo‘l qurish va ulardan foydalanish bo‘yicha tahsil oladi. O‘qishlari uchun paritet asosida to‘lanadi.  

Qayd etilishicha, joriy o‘quv yilida Afg‘onistondagi siyosiy vaziyat keskinlashgani sababli birinchi kurs talabalarini ishga qabul qilish amalga oshirilmadi. Biroq qo‘shni davlat rasmiylari bilan allaqachon kelishuvga erishilgan va 2022-yil fevral oyida yana 100 nafarga yaqin afg‘onistonlik Termizga maxsus kurslarga keladi.

• Afg‘oniston
• Ta'lim
• Ta'til
• Termiz