Bugun Toshkent shahar hokimligining bergan xabariga ko‘ra, poytaxtda joylashgan bir restoran faoliyatini to‘xtatgan. Ushbu ovqatlanish majmuasi ustidan Yakkasaroy tumani, Shota Rustaveli ko‘chasi 59-uyda istiqomat qiluvchi aholi tomonidan Toshkent shahar hokimligiga murojaat kelib tushgan. Unga ko‘ra, ko‘p qavatli uyning birinchi qavatida joylashgan "Yalpiz" restorani o‘z faoliyati bilan shu uy aholisiga qator noqulayliklar keltirishi aytilgan.
Xususan, restoranning uy hovlisida joylashgan xo‘jalik qurilmasida restoran rahbariyati tomonidan oshxona tashkil qilinib, restoran dudbo‘ronlari, konditsionerlar qatorida taomlarni tayyorlash uchun issiqlik uskunalari, shu jumladan mangal o‘rnatilgani, mangal ko‘mirda yoqilishi va bu ko‘p qavatli uy uchun yong‘in xavfini keltirib chiqarishi vaj qilingan.
Shuningdek, bevosita aholi derazalariga yaqin joylashgan dudbo‘ronlardan chiqayotgan shovqin va qovurilgan taomlarning hidi, aholi uchun katta noqulaylik tug‘dirishi aytilgan. Bundan tashqari, restoran xodimlari tomonidan uy hovlisida chiqindilar tashlab ketilishi keltirilgan.
Hokimiyatning bergan xabariga ko‘ra, ushbu holat Toshkent shahar hokimligining nazoratiga olinib, Sanitariya-epidemiologik osoyishtalik va jamoat salomatligi qo‘mitasining Toshkent shahar boshqarmasi yordamida tegishli o‘rganish hamda tekshiruvlar olib borilmoqda.
Natijada, 25-noyabr kuni umumiy ovqatlanish maskanining rahbariyati tomonidan faoliyatda qator kamchiliklarga yo‘l qo‘yilgani aniqlanib, ularni belgilangan muddat ichida bartaraf etish majburiyati yuklangan. Shu jumladan, Shota Rustaveli ko‘chasi, 59-uy hovlisida joylashgan uskunalarni boshqa, aholiga noqulaylik tug‘dirmaydigan joyga ko‘chirish belgilanib, restoranning faoliyati kamchiliklar bartaraf etilishiga qadar to‘xtatilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!