O‘zbekiston respublika tovar-xom ashyo birjasi (O‘zRTXB) avtomobil benzinining narxlaridagi o‘sish tendensiyasiga e’tibor qaratdi.

Birja bergan ma’lumotga ko‘ra, joriy yil boshidan buyon AI-80 markali benzinning bir tonnasi uchun 5 700,2 ming so‘mdan 9 302,8 ming so‘mgacha, ya’ni 63,2 foizga o‘sgan. Birja savdolariga qo‘yilayotgan mazkur markali benzinning aksariyat qismi, ya’ni 84 foizi Buxoro neftni qayta ishlash zavodi hissasiga to‘g‘ri keladi.

Ko‘rib chiqilayotgan davrda mazkur markali benzinning boshlang‘ich bahosi ham o‘rtacha 70 foizga o‘sib, mahsulotning bir tonnasi uchun 10 005,0 ming so‘mni tashkil qildi. 

Qayd etilishicha, o‘tkazilgan ochiq birja savdolari natijasida AI-80 markali benzinining boshlang‘ich va birja narxlari o‘rtasida tafovut o‘rtacha 1 foizdan oshmagan, ya’ni benzin birja savdolari davomida deyarli o‘zining boshlang‘ich bahosida sotilgan.

Shu bilan birga, narxlarning ko‘tarilishi jahon birjalarida ham kuzatilmoqda. Xususan, Brent markali neftning jahon bozorlardagi narxi joriy yilning boshiga nisbatan o‘rtacha 60-70 foizga o‘sgan.

O‘zRTXB benzin bozoridagi vaziyatni muntazam o‘rganib borayotganini, tahlillar natijasi va benzin bozorida narxlarni barqarorlashtirish bo‘yicha takliflar Monopoliyaga qarshi kurashish qo‘mitasi va boshqa tegishli vazirlik va idoralarga kiritib borilayotganini ta’kidlamoqda.

• Benzin
• Birja
• Narx-navo