Bugungi kunda ichki bozorlardagi shakar mahsuloti narxining asossiz keskin oshishi kuzatilmoqda. Monopoliyaga qarshi kurashish qoʻmitasi (MQKQ) narxlarni asossiz oshirayotgan tadbirkorlarni ogohlantirdi.

Xabarda keltirilishicha, Rossiya va Ukrainaning shakar eksportini toʻxtatgani Oʻzbekistonga hech qanday taʼsir qilmaydi. Bu ikki davlatning ichki bozordagi ulushi bor-yoʻgʻi 2 foizni tashkil etadi. Mahalliy shakar zavodlari shakar xomashyosini jahon birja kotirovkalariga nisbatan arzon narxlarda Braziliyadan xarid qilishmoqda.

Qayd etilishicha, Oʻzbekistonda ikkita – “Xorazm shakar” va “Angren shakar” masʼuliyati cheklangan jamiyatlarida joriy yil 15-mart holatiga 260 ming tonna shakar mavjud.

Shundan omborda 40 ming tonna tayyor shakar va 32 ming tonna xomashyo, iyun oyiga qadar 178 ming tonna xomashyo yetkazib beriladi.

Qoʻmita ichki bozorni shakar bilan uzluksiz taʼminlash maqsadida birja savdolariga kunlik qoʻyiladigan hajmni oʻrtacha 30 foizga oshirmoqda.

Bundan tashqari, hukumat aholiga shakar yetarli miqdorda va maqbul narxlarda yetkazib berilishi uchun zarur choralarni koʻrmoqda. Barcha hududlardagi bozorlarda “Elga xizmat” rastalarida maqbul narxda shakar sotish topshiriqlari berilmoqda.

Shuningdek tadbirkorlardan shakarga boʻlgan narx-navoni asossiz oshirmaslik va isteʼmolchilarga noqulaylik tugʻdirmaslik soʻralib, aks holda Qonunchilikda belgilangan tartibda chora koʻrish mumkinligi yuzasidan ogohlantirilgan.

• Aksilmonopoliya
• Narx-navo
• Shakar