Monopoliyaga qarshi kurashish qo‘mitasi ijtimoiy tarmoqlarda muhokamalarga sabab bo‘layotgan qolipli non narxi bo‘yicha munosabat bildirdi. Tezkor o‘tkazilgan o‘rganishlarga ko‘ra Toshkent shahrida eng yuqori - 2800 so‘m, Qashqadaryoda viloyatida eng past – 1650 so‘m, respublika bo‘yicha o‘rtacha narx esa 2250 so‘m ekanligi aniqlangan.

Shuningdek, un mahsuloti joriy yil iyun oyidan boshlab birja savdolariga yetarli miqdorda qo‘yilayotgani va bu jarayon ustidan doimiy nazorat o‘rnatilgani qayd etildi.

Qayd etilishicha, joriy yil iyun oyida 170 ming tonna un birjaga qo‘yilgan bo‘lib, bunda har bir non ishlab chiqaruvchi uchun teng sharoit yaratish maqsadida kichik lotlarda (3 tonnadan) qo‘yilmoqda. Joriy yil 1-iyun holatida 50,5 ming tonnadan ortiq un mahsuloti qoldig‘i mavjud bo‘lib, avgust oyi uchun ham un ishlab chiqarish uchun korxonalarda zarur don zaxiralari mavjud.

“Shu o‘rinda aytib o‘tish lozimki, un mahsuloti realizatsiya qilinishining bozor tamoyillariga asoslangan mexanizmi joriy qilinishi, birinchi navbatda bug‘doy yetishtiruvchi fermer va dehqonlardan tortib, ishlab chiqaruvchi va isteʼmolchilar manfaatini ko‘zlab qilingan qadam bo‘lib, ushbu jarayonda shaffof tizim yaratilishi bilan birga, respublikaning eng chekka hududlariga ham mahsulotning yetib borilishi nazoratga olingan.

Shuni eʼtiborga olib, non ishlab chiqaruvchi va sotuvchilar hamda aholidan bu borada havotirga tushmasliklarini, ijtimoiy tarmoqlar orqali tarqatilayotgan asoslanmangan maʼlumotlarga ishonib, sunʼiy ajiotaj vujudga keltirmasliklarini so‘rab qolamiz”, – deyiladi Qo‘mita munosabatida.

• Aksilmonopoliya
• Bozor
• Munosabat
• Narx-navo
• Non