Oʻzbekiston Axborot texnologiyalari va kommunikatsiyalarini rivojlantirish vazirligi delegatsiyasi Amerika Qoʻshma Shtatlarida boʻlib turibdi. Vazir Sherzod Shermatov 21-iyun kuni Visa kompaniyasiga bordi.

Qayd etilishicha, tashrif davomida Visa kompaniyasi vakillari bilan kichik va oʻrta biznesni rivojlantirish va uning salohiyatini oshirish, shuningdek, potensial hamkorlik platformasini yaratish, shu jumladan, onlayn toʻlovlar va boshqa sohalardagi hamkorlikning ustuvor yoʻnalishlari muhokama qilingan.

Xususan, vazirlik delegatsiyasi Visa maʼlumotlar markaziga ham tashrif buyurib, uning faoliyati bilan tanishgan. Mehmonlarga markaz haqida batafsil maʼlumotlar berilib, taqdimot oʻtkazilgan.

Uchrashuvda Oʻzbekistonda AKT sohasini rivojlantirish, raqamlashlashtirish va texnologiyalarni amalga oshirishda hamkorlik qilish maqsadida AKT vazirligi va Visa kompaniyasi oʻrtasida hamkorlik memorandumi imzolangani maʼlum qilindi.

• AKT
• Hamkorlik
• Shermatov
• Visa