Shu yilning 30-noyabr kuni tadbirkor Alisher Usmonov Toshkentda o‘tkazilgan Kongress davomida Xalqaro qilichbozlik federatsiyasi prezidenti etib saylangan edi.

Usmonov vakilining Ria Novosti nashriga ma’lum qilishicha, funksioner prezident etib saylangan kunining ertasiga ixtiyoriy ravishda o‘z lavozimini tark etgan.

“Alisher Usmonov o‘zining g‘alabasidan so‘ng, FIE manfaatlaridan kelib chiqib, unga nisbatan joriy etilgan yuridik jihatdan asossiz sanksiyalarning FIE va uning faoliyatiga tarqalishiga yo‘l qo‘ymaslik uchun zarur choralarni ko‘rishini ma’lum qildi va shu munosabat bilan FIE ijroiya qo‘mitasini o‘z vakolatlarini ixtiyoriy ravishda to‘xtatib turgani haqida xabardor qildi. Hammasi qonun va adolat doirasida hal qilinishi kerak”, – degan Usmonovning vakili.

“FIE Ijroiya qo‘mitasi 1-dekabr kuni yig‘ilib, unga federatsiyaning samarali faoliyatini ta’minlash maqsadida janob Alisher Usmonovning FIE prezidenti lavozimini o‘z ixtiyori bilan to‘xtatish to‘g‘risidagi qarori haqida ma’lumot berildi”, – deyiladi federatsiya rasmiy bayonotida.

• Alisher Usmonov
• Qilichbozlik