Bugungi mavzumiz asli o‘zbekistonlik bo‘lgan millirder Alisher Usmonov haqida. Ukrainada urush harakatlari boshlangach, YeI va AQSh Alisher Usmonovga nisbatan sanksiyalar e‘lon qildi. Forbes nashri esa milliarderning asosiy e‘tiborini O‘zbekistonga qaratayotganligi va mamlakatga kiritayotgan sarmoyalari hissasini ikki karra oshirganligi haqida yozmoqda.

Alisher Usmonov Rossiyaning Ukrainaga qarshi harakatlari sababli boshqa rossiyalik milliarderlar qatorida G‘arb sanksiyalariga duch keldi. Bu orada Alisher Usmonov o‘z asosiy e‘tiborini ona vatani - O‘zbekistonga qaratmoqda, deya yozadi Forbes nashri.

“Menga qarshi sanksiyalar nohaq va asossiz ayblovlarga asoslangan. Shaxsiy mablag‘larni xayriya qilish va investisiyalarni jalb qilish qiyinroq: aslida bu cheklovlar nafaqat menga, balki yordamimga muhtoj bo‘lgan barcha odamlarga ham ta‘sir qildi. Shuning uchun mening hozirgi vazifam ularga yordam berishdir”, - dedi Alisher Usmonov.

“Hozirda O‘zbekiston iqtisodiyoti yiliga 7% ga o‘smoqda, u hozirgacha Markaziy Osiyodagi eng ko‘p aholiga ega va yosh, o‘sib borayotgan aholiga ega mamlakatdir hamda boshqa qo‘shni bozorlaridan farqli o‘laroq, iqtisodiyoti yaxshi diversifikatsiyalangan”, - deydi hozirda O‘zbekistonda joylashgan “Bluestone” kichkik investitsion banki hamkori Kuinn Martin.

“Bir necha yillar avval men bu yerda na yashay va na ishlay olardim. Ammo bugun men o‘z maqsadimni O‘zbekistonning salohiyatini to‘liq ro‘yobga chiqarishga yordam berish deb bilaman. Bu mamlakatda iqtidorli va mehnatkash odamlar talaygina”, - deydi u va Mirziyoev O‘zbekistonni dunyoga olib chiqish uchun “bor kuchini” sarflayotganini ham qo‘shimcha qiladi.

“Paxtani qayta ishlash, meva-sabzavot yetishtirish, shuningdek, mamlakatning tog‘-kon resurslarini o‘zlashtirish, xususan, rangli metall rudalarini qazib olish va qayta ishlash sarmoya kiritish uchun eng qiziqarli yo‘nalishlardir”, - deydi Usmonov.

“O‘zbekistonga sarmoya kiritish yaqinda “Berlin devori qulashi”ni boshidan kechirgan mamlakatga sarmoya kiritish kabi misli ko‘rilmagan imkoniyatdir: bu yopiq sosialistik davlatdan bozor iqtisodiyotiga tez va keng miqyosda o‘tish kabi holat”, - deydi Londondagi “Sturgeon Capital” hamkori Aleks Branton.

“O‘ylaymanki, hozir investorlar uchun O‘zbekiston bozoriga kirish uchun qulay vaqt. Men hammani bu yerga sarmoya kiritishga chorlayman. Men aksiyador bo‘lgan kompaniyalar bu yerda metallurgiya, sement ishlab chiqarish va telekommunikatsiya sohalariga sarmoya kiritmoqda”, - deydi Alisher Usmonov, va ishlab topgan barcha pullari O‘zbekistonda qolishini ham qo‘shimcha qiladi.

• Alisher Usmonov
• O‘zbekiston
• milliarderlar