Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov TikTok kompaniyasi rahbariyati bilan muzokaralar boshlaganini va unda mazkur platformani o‘zbek mentaliteti va qadriyatlariga moslashtirish masalasi ko‘rilganini ma’lum qilmoqda.

“Aynan shu maqsadda bugun TikTok kompaniyasining vitse-prezidenti doktor Teo Bertram va kompaniyaning mas’ul xodimlari bilan juda samarali onlayn uchrashuv o‘tkazdik”, – deb yozadi Allamjonov.

Allamjonovning o‘ylashicha, TikTok va bunga o‘xshash kompaniyalar faoliyatini cheklash emas, balki ular bilan yaqindan muloqot, hamkorlik o‘rnatgan holda ishlash hamma uchun ko‘proq manfaatli va to‘g‘riroq bo‘ladi.

“Uchrashuvda o‘zaro hamkorlik masalalarini muhokama qildik. TikTok vakillariga tarmoqning ichki normalari va ayrim tartib-qoidalarini ko‘rib chiqish, uni O‘zbekiston qadriyatlari, urf-odatlar va mentalitetimizga moslash bo‘yicha takliflar berdim. Ular tomonidan bu taklif albatta inobatga olinishi, bu borada hamkorlik, shu bilan birga o‘zbek tilini ham kiritishga tayyor ekanliklari ma’lum qilindi”, – deb ma’lum qilmoqda uchrashuv yakunlari haqida Komil Allamjonov.

• Allamjonov
• TikTok