Joriy yilning 5-iyul kuni “Santana” guruhi asoschisi amerikalik musiqachi Karlos Santana suvsizlanish tufayli sahnada hushidan ketdi. Bu haqda “The Rolling Stone” nashri xabar berdi.

Qayd etilishicha, o‘tgan asrning 60-yillaridan beri gitara bilan o‘z qo‘shiqlarini tinimsiz ijro etib kelayotgan musiqachi tananing asosiy ehtiyojlarini unutgan. Hushiga kelganidan so‘ng u ijtimoiy tarmoqlardagi sahifalari orqali, duolari uchun muxlislarga minnatdorchilik bildirdi

Karlos Santana Klarkstondagi (Detroyt yaqinida) “The Pine Knob” musiqiy teatrida chiqish qilib, spektakl chog‘ida sahnaga yiqilgan. Shundan so‘ng unga boshqa musiqachilar, sahna xodimlari va tibbiyot xodimlari yordam ko‘rsatishgan.

Uni sahnadan olib ketishayotganda 74 yoshli musiqachi tomoshabinlarga qo‘l silkitdi. Santana tekshiruv uchun mahalliy tez yordam bo‘limiga olib ketildi. Uning menejeri Maykl Vrionisning so‘zlariga ko‘ra, hozirda ijodkor o‘zini yaxshi his qilmoqda.

Shu kunning o‘zida Karlos ijtimoiy tarmoqlar orqali muxlislariga murojaat qildi: “Qimmatli ibodatlaringiz uchun rahmat. Havotir olmang. Ovqatlanishni va suv ichishni unutib qo‘ygan edim, suvsizlanish yuz berdi, shuning uchun hushimdan ketdim. Barchangizga baxt va mo‘ʼjizalar hamroh bo‘lsin”, – deb yozgan keksa musiqachi.

Iyun oyida Santana Chikagoda joylashgan “Earth, Wind & Fire” guruhi bilan “G‘ayritabiiy mo‘jiza” nomli gastrol konsertida ishtirok etmoqda. Sanʼatkorlar bugun, 6-iyul kuni Pensilvaniya shtatining Burgetstaun shahrida bo‘lib o‘tishi rejalashtirilgan navbatdagi shoularini boshqa kunga ko‘chirishdi.

Bundan avval 2021-yil dekabr oyida ham musiqachining Las-Vegasdagi bir qator konsert dasturlari bekor qilgan edi. Bunga rejadan tashqari yurak operatsiyasi sabab bo‘lgandi.

Santananing so‘nggi albomi – “Corazon” 2014-yilda chiqarilgan. Musiqachining eng mashhur asari 1999-yilgi platina albomi – “Supernatural” bo‘lib, u 15 marta chiqarilgan va har safar 2 million nusxada sotilgan.