Ijtimoiy tarmoqlarda Andijon shahar hokimiga tegishliligi aytilgan audioyozuv tarqaldi. Unda fuqaro va mansabdorning o‘zaro suhbati aks etgan bo‘lib, mansabdor fuqarodan nega “hadeb qo‘ng‘iroq qilayotgani”ni so‘raydi va uni haqoratli so‘zlar bilan “siylaydi”.

Andijon viloyati hokimligi Matbuot xizmati holat yuzasidan o‘rganish o‘tkazib, ovoz haqiqatda Andijon shahar hokimi Bahromjon Haydarovga tegishli ekanini tasdiqladi.

Ma’lum bo‘lishicha, fuqaro O.N yashab kelgan uy (asl egasi fuqaroning onasi) snosga tushib, o‘sha hududda hozirgi kunda “Sulton xaus” MChJ qurilish firmasi tomonidan ko‘p qavatli uy qurilmoqda. Fuqaro O.N esa ayni vaqtda ijaraga chiqarilgan va ijara haqi doimiy ravishda to‘lab kelingan.

Viloyat hokimligi matbuot xizmatining ma’lum qilishicha, audioyozuvdagi holatga fuqaroning shahar hokimiga bir kunda 10-15 marta qo‘ng‘iroq qilib, snosga tushgan uyi (52 kv.m) evaziga qurilish firmasidan shahar markazidan 400 kv.metrdan iborat bo‘lgan uy-joy va Gentra undirib berishini so‘rashi sabab bo‘lgan.

Shuningdek, fuqaro “shahar hokimini doimiy obro‘sizlantirib kelgan”likda ham ayblanmoqda.

Aniqlanishicha uyning asl egasi (fuqaroning onasi) va qurilish firmasining o‘zaro shartnomasi bor va unga ko‘ra fuqaroning onasi yangi qurilayotgan uylardan xonadonga ega bo‘ladi.

“Bundan tashqari Andijon shahar hokimining fuqaro bilan muloqoti davomida ishlatgan haqoratli so‘zlari uchun Andijon viloyati hokimligi tomonidan alohida huquqiy baho berilishini ma’lum qilamiz”, – deyiladi Viloyati hokimligi Matbuot xizmati munosabatida.

• Andijon
• hokim