Ijtimoiy tarmoqlarda viloyat hokimi Shuhrat Abdurahmonovning topshirig‘i ekani aytilib, viloyatda “Andijon polkasi” oyligi eʼlon qilingani taʼkidlangan xabarnoma surati tarqalmoqda.

Unga ko‘ra, “Andijon polkasi” kuyi yaratilganligining 100 yilligi hamda shu nomdagi xalq raqs ansambli tashkil etilganligining 65 yilligi munosabati bilan joriy yil 25-apreldan eʼtiboran barcha tashkilotlar, xususan, “o‘zini haqiqiy andijonlikman deb bilganlar” har kuni Andijon polkasi raqsiga tushishni odat tusiga kiritishlari bo‘yicha viloyatda “Andijon polkasi” oyligi eʼlon qilingan.

Shuningdek, bu borada chelenjlar va fleshmoblar tashkil qilish orqali ham Andijon polkasini ommalashtirish zarurligi belgilangan.

Tashkilot va idoralar rahbarlari yuqorida belgilab berilgan tadbirlar natijasi haqida har juma kuni soat 15:00 ga qadar viloyat hokimligi turizm kotibiyatiga fotoalbomni ilova qilgan holatda hisobot topshiradilar.

Mazkur topshiriqning ijrosi yuzasidan Qo‘rg‘ontepa tumani hokimligi allaqachon ish boshlagan. Hokimlik axborot xizmati tumandagi Tibbiyot texnikumi, Pedagogika kolleji talabalari hamda 1-son kasb-hunar maktabining o‘quvchilarining Andijon polkasiga raqs tushayotgani aks etgan videolarni eʼlon qildi.

• Andijon
• Andijon polkasi
• Shuhrat Abdurahmonov