Universitet maʼmuriyati ushbu holat yuzasidan rasmiy munosabat bildirdi.

Unga ko‘ra, joriy yilning 4-dekabr kuni soat 14:00 atrofida Andijon davlat universiteti 1000 oʻrinli binosi 4-qavatidan ayol kishi ehtiyotsizlik oqibatida tushib ketgan.
Xabarda keltirilishicha, 4-dekabr kuni ijtimoiy-iqtisodiyot fakulteti talabalari ota-onalari uchun majlis oʻtkazilgan. Majlis universitetning 1000 oʻrinli binosi 4-qavatida joylashgan kichik majlislar zalida boʻlib oʻtgan. Unda ishtirok etgan talabalardan birining kelinoyisi yigʻilish boʻlayotgan vaqtda telefon boʻlib qolgani sababli yigʻilishdan chiqib, telefonda suhbatlashgan.
Shuningdek, ayni vaqtda shu qavatda binoning zinalarini yangi, baquvvatrogʻiga alishtirish uchun eskisi olib tashlanib, yangisini oʻrnatilish ishlari amalga oshirilayotgan boʻlgan. 
Ayol telefonda suhbatlashish jarayonida qurilish boʻlayotgan hududni anglatuvchi belgi va toʻsuvchi tasmalarga ahamiyat bermasdan zinapoya tomonga yurgan va eʼtiborsizlik oqibatida tushib ketganligi ta’kidlangan. Xususan, bunda qurilish-ta'mirlash ishlari olib borilayotgan hudud to‘liq berkitib qo‘yilmaganligi, to‘siq lentalariga esa e'tibor bermasligi ham sabab bo‘lgan.
Ma’lumotlarga ko‘ra, hodisa yuz bergan vaqtning oʻzidayoq universitetning masʼul xodimlari tomonidan shoshilinch tez yordam chaqirilib, fuqaro respublika shoshilinch tez tibbiy yordam ilmiy markazi viloyat filialiga universitet maʼmuriyati vakillari hamrohligida olib borilgan va birinchi yordam koʻrsatilgan. 
Eslatib o‘tamiz, ijtimoiy tarmoqlarda homilador ayol binodan tushib ketganligi to‘g‘risida video xabar tarqalgan edi. Aslida, ayol homilador bo‘lmagan.

• Andijon