“O‘zbekiston temir yo‘llari” AJ va Germaniyaning yirik logistika kompaniyasi bilan hamkorlikda zamonaviy multimodal transport logistika markazi tashkil etiladi. Bu haqda “O‘ztemiryo‘lkonteyner” matbuot xizmati xabar berdi.

Qayd etilishicha, O‘zbekiston prezidentining 2023-yil sentyabr oyida Germaniyaga tashrifi davomida “O‘zbekiston temir yo‘llari” AJ va Germaniyaning “Rhenus SE&Co. KG” kompaniyalari o‘rtasida Andijon viloyatida hamkorlikda zamonaviy multimodal logistika markazini qurish bo‘yicha kelishuvga erishilgan.

Ushbu kelishuvga ko‘ra, Andijon logistika markazi negizida “O‘ztemiryo‘lkonteyner” AJ va “Rhenus SE&Co. KG” kompaniyalari o‘rtasida “UzContargo Andijan” qo‘shma korxonasini tashkil etish ishlari amalga oshirilmoqda. Zamonaviy logistika markazi ochiq va yopiq bojxona omborlari, konteynerlarni ortish-tushirish maydoni, og‘ir yuklarni qayta ishlash va multimodal tashuvlarni amalga oshirish imkoniyatlarini yaratadi.

2024-2026-yillarda loyihaga 20 million yevro investitsiya kiritish orqali kelgusida logistika markazida yiliga 250-300 ming tonna yukni qayta ishlash imkoni yaratiladi. “UzContargo Andijan” qo‘shma korxonasining rasmiy ochilish marosimi mart oyining oxiriga rejalashtirilmoqda.

• Germaniya
• Hamkorlik
• Logistika