Andijon viloyati Paxtaobod tumanida Ucell filiali xodimi qariyb 450 million so‘mni o‘zlashtirib, keyinchalik Binance birjasida yutqazib qo‘ygan. Bu haqda Oliy sud matbuot xizmati xabar berdi.

Aniqlanishicha, 24 yoshli A.I. filialda katta sotuvchi bo‘lib ishlagan. U Paynet ilovasida kompaniyaning depozit hisobvarag‘iga kirish huquqiga ega bo‘lgan. Undan fuqarolarning telefon raqamlariga to‘lovlar amalga oshirilgan.

2023-yil oktyabr oyining oxirida u Binance birjasida Bitcoin kripto-valyutasini sotib olish va sotish bo‘yicha bitim tuzishga qaror qilgan. U depozit hisobvarag‘idan 198,9 million so‘mni o‘z kartasiga o‘tkazgan.

O‘sha yilning noyabr oyida shu usulda kompaniyaning 249 mln 907 ming so‘m mablag‘ini o‘z bank kartasiga o‘tkazib, yana onlayn birjaga tikkan. Ammo uning omadi kelmagan va kompaniyaning jami 448 mln so‘mdan ortiq pulini yutqazib qo‘ygan. Sudda A.I. aybiga iqror bo‘lib, yetkazilgan zararni qoplaganini, qilgan ishidan pushaymonligini aytgan va o‘ziga nisbatan qonuniy yengillik berishni so‘ragan.

Sud qarori bilan A.I. Jinoyat kodeksining 167-moddasi 3-qismi “a” bandida ko‘rsatilgan jinoyatni (juda ko‘p miqdorda o‘zlashtirish yoki rastrata yo‘li bilan talon-toroj qilish) sodir qilganlikda aybli deb topilgan.

Unga nisbatan 1 yil davlat hamda davlat ulushi ishtirokidagi korxonalarda mansabdorlik va moddiy javobgarlik yuklatilgan vazifalarda ishlash huquqidan mahrum qilib, har oylik ish haqining 20 foizini davlat daromadi hisobiga ushlab qolgan holda 2 yil axloq tuzatish ishlari jazosi tayinlangan.

• Oliy sud