Joriy yil 2-dekabr kuni bo‘lib o‘tgan Senatning prokuratura organlari faoliyati ustidan nazorat qiluvchi komissiyasi yig‘ilishida Andijon viloyatida yoshlar muammolarining o‘rganilishi masalasi ko‘rildi.

Yig‘ilishda viloyatdagi o‘rganishlar davomida bir qator kamchiliklarga yo‘l qo‘yilganligi tanqid qilindi.

Jumladan, yoshlarning bandligini ta’minlash, ularning muammolarini hal etish maqsadida ishlab chiqilgan “yoshlardaftari.uz” yagona elektron platformasiga kiritilgan 735 nafar yoshlarni asossiz ravishda chiqarib yuborilish holatlari aniqlangan.

Shuningdek, “Yoshlar daftari”ga kiritilganlardan 23 479 nafariga tuman hokimlarining farmoyishlari asosida yer maydonlari ajratib, bandligi ta’minlanganligi va daftardan chiqarilganligi o‘rganilganda, ulardan 44 nafar yoshlar yer maydonlarini olmaganligi, hattoki bundan xabardor emasligi ma’lum bo‘ldi.

Bundan tashqari shaxsga bir martalik moddiy yordam berilishi uni “Yoshlar daftari”dan chiqarishga asos bo‘lmasligi belgilanganiga qaramay Andijon shahrida Yoshlar jamg‘armasi tomonidan bir martalik yordam berilgan jami 790 nafar yoshlardan 303 nafari “Yoshlar daftari”dan asossiz ravishda chiqarib yuborilgan.

Shu bilan birga, 2021-yilda yangi ish o‘rinlarini tashkil etish bo‘yicha dasturda belgilangan reja bajarilganligi qayd etilgan bo‘lsa-da, Soliq inspeksiyasi bazasidagi ma’lumotlar bilan taqqoslanganda ayrim ish o‘rinlari o‘z tasdig‘ini topmaganligi senatorlar tomonidan ko‘rsatildi.

“Tuman (shahar) hokimlarining qarorlari bilan zaxiraga olingan ish o‘rinlariga aholining ijtimoiy ehtiyojmand toifalarini ishga joylashtirish ishlari sust olib borilgan. Ya’ni zaxira (kvota)langan ish o‘rinlaridan foydalanish darajasi viloyatda 64,2 foizni tashkil etganligi bois, bugungi kunda 3 651 ta zaxira ish o‘rinlari foydalanmasdan qolgan”, – deyiladi Senat ma’lumotida.

Yig‘ilishda ushbu yo‘nalishda uchrayotgan tizimli xato va kamchiliklarni bartaraf etish maqsadida prokuratura organlari, Bandlik va mehnat munosabatlari vazirligi hamda viloyat hokimligiga Komissiya a’zolari tomonidan tavsiyalar berilib, tegishli topshiriqlar aks ettirilgan qaror qabul qilindi.

• Andijon
• Senat