Andijon viloyatining Xonobod shahrida shu yilning 29-30-31-iyul kunlari bo‘lib o‘tgan “Dunyo sadolari” xalqaro milliy estrada san’ati festivaliga jami 6 milliard so‘m mablag‘ sarflangan. Bu haqda viloyat matbuot xizmati ma’lumot berdi.

Qayd etilishicha, Xalqaro festival davomida Xonobod shahriga mahalliy va xorijiy tashrif buyuruvchilar soni 2,5 barobarga (2 mln nafar) ortgan.

Shuningdek, tadbirkorlik subyektlarida tushum keskin ortgan. Jumladan, 2024-yilning 7 oyi davomida tushum 48 milliard so‘mni tashkil qilib, (shundan 29-30-31 iyul kunlari 8,5 milliard so‘mga yetgan) o‘tgan yilning mos davrida nisbatan 2 barobarga ortgan.

Ta’kidlanishicha, bu ko‘rsatkichlar Xonobod shahridagi tadbirkorlik subyektlarining va aholining daromadi oshganligini ko‘rsatadi.

Savdo va xizmat ko‘rsatish faoliyati bilan shug‘ullanuvchi tadbirkorlar soni o‘tgan 2023-yilda 48 tani tashkil etgan edi. 2024-yildagi xalqaro tadbir davomida doimiy faoliyat olib boruvchi tadbirkorlik faoliyatlari soni 230 taga ko‘payib, qariyb 5 barobarga ortgan.

Mehmonlarga xizmat ko‘rsatuvchi dala hovli va uy-mehmonxonalaridagi yotoq joylar soni 1900 tani tashkil qilgan bo‘lsa 2024-yilda bu raqam 6 mingdan ortgan.

Bundan tashqari, aholi daromadlarini oshirish, ish bilan ta’minlash va kam daromadli fuqarolarning daromadini oshirishda “Sayxunobod”, “Uychi” tajribasi asosida 600 dan ortiq xonadonlarda uy-mehmonxonalar tashkil etilgan.

• Andijon
• Festival