Toshkent viloyati Angren shahrida maxsus reyd tadbiri davomida “GAI” haydovchi bilan kelishmovchilik paytida mashina oynasini sindirdi. Viloyat Ichki ishlar bosh boshqarmasi matbuot kotib holat yuzasidan izoh berdi

Ma’lum qilinishicha, YPX inspektori haydovchiga “Xavfsiz hudud” maxsus tadbirida ekani haqida aytgan, fuqaro esa u tarafga sigareta puflaganicha hujjatlarni taqdim etishdan bosh tortgan.

Xodim xolislar ishtirokida bir necha marotaba, yaxshi muomala bilan, undan hujjatlarini taqdim etishini so‘ragan. So‘ng mashina eshigini ochishga uringan vaqtida esa haydovchi uning qo‘lini eshik oynasiga qisib olgan.

“Endi xolis fikringizni ayting, shu vaziyatda YPX inspektori haydovchini tekshirmasligi, mayli, hujjat bermas ekanlar deb qo‘yib yuborishi kerakmidi?”, – deydi matbuot kotibi.

“Xavfsiz hudud” tezkor profilaktik tadbiri odatda kriminogen vaziyat yuzasidan huquqbuzarlik yoki jinoyatchilik nisbatan ko‘paygan hududlarda tashkil etiladi.

Bundan tashqari, Bobur To‘laganov blogerlardan ma’lumotni to‘g‘ri talqin qilish va aniqlik kiritib olgandan keyin tarqatishini so‘ragan.

“Shu o‘rinda ‘ayrim’ blogerlarni axborotni to‘g‘ri talqin qilishga chorlamoqchiman. Qo‘lingizga biror ma’lumot kelib tushgan taqdirda uni tegishli tashkilot mas’ullari bilan bog‘lanib, aniqlashtirib oling, iltimos!

Mavzuni bir tomonlama yoritib, keyin unga munosabat so‘rashingiz katta xato. Chunki birinchi tarqatilgan axborot, garchi noto‘g‘ri bo‘lsa ham, ko‘pchilik odamlar nazarida haq bo‘lib qolaveradi. Birinchi urinishdayoq to‘liq, xolis va to‘g‘ri axborot tarqating. Jurnalistlardan ustoz olsangiz nur ustiga nur. Yuqoridagi gaplar albatta ‘ayrim’ qo‘shtirnoq ichidagi, shoshqaloq blogerlarga taalluqli. Xolis faoliyat yurituvchilar sizga ming rahmat”, – deydi Bobur To‘laganov.

• IIB
• Toshkent
• YPX