Toshkent viloyati markazlashtirilgan kommunal suv ta’minoti tizimiga noqonuniy ulangan MCHJ aniqlandi. Bu haqda Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Angren shahar bo‘limi tomonidan “Toshkent suv ta’minoti” MCHJ shahar filiali xodimlari bilan hamkorlikda tergovga qadar tekshiruv o‘tkazilgan.

Unda “Ch.S.” MCHJ mas’ul shaxslari markazlashtirilgan kommunal suv ta’minoti tizimiga suvni hisobga olish uskunalarini o‘rnatmasdan ulangani aniqlangan. Natijada “Toshkent suv ta’minoti” MCHJ manfaatlariga jami 831,6 mln so‘m zarar yetkazganligi aniqlangan.

Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Suv ta’minoti