Mustaqil faoliyat koʻrsatuvchi Nemolchi.uz loyihasi asoschisi, jamoatchilik faoli, jurnalist Irina Matviyenko ijtimoiy tarmoqlardagi shaxsiy sahifalarida unga oʻlim bilan tahdid qilingani tufayli Oʻzbekistonni tark etgani haqida maʼlum qilgan. Mazkur holat boʻyicha Oʻzbekiston Axborot va ommaviy kommunikatsiyalar agentligi rasmiy munosabat berdi.

Qayd etilishicha, “Jurnalistlik faoliyatini himoya qilish toʻgʻrisida”gi qonunning 10-moddasida, jurnalist oʻz kasbiga doir faoliyatni amalga oshirishida uning himoya qilinishini taʼminlashi lozimligi, shuningdek, ushbu qonunning 14-moddasida jurnalistning qonunda belgilangan huquqlarini buzganlik, uning hayoti, sogʻligʻi va mol-mulkiga tahdid, zoʻravonlik yoki tajovuz qilganlik qonun hujjatlariga muvofiq javobgarlikka sabab boʻlishi belgilangan.

Bu kabi himoyaviy kafolatlar “Ommaviy axborot vositalari toʻgʻrisida”gi qonunning 5-moddasida ham oʻz ifodasini topgan.

AOKA bu kabi holatlarni soʻz va axborot erkinligini taʼminlash, jurnalistlarning erkin faoliyat koʻrsatishi borasidagi yangicha ochiqlik siyosatiga zid xatti-harakatlar sifatida keskin qoralashi taʼkidlangan.

Shunga koʻra, AOKA voqelikni oʻrganish hamda vaziyatga huquqiy baho berish uchun Bosh prokuraturaga ushbu masalani nazoratga olishni soʻrab rasmiy xat orqali murojaat qilgan.

Keltirilishicha, ayni paytda I.Matviyenkoning shaxsiy sahifasida eʼlon qilingan xabar huquqni muhofaza qilish organlari va mutasaddi idoralar tomonidan oʻrganilmoqda.

“Agentlik olib borilayotgan oʻrganish natijalarini diqqat bilan kuzatib boradi hamda jurnalist hayoti xavfsizligi taʼminlanishiga, shuningdek, qonunchilikka zid ravishda tahdid qilgan shaxslarga nisbatan qonuniy choralar koʻrilishiga ishonadi”, – deyiladi agentlik xabarida.

• AOKA
• Jurnalistika
• rasmiy munosabat