Apple bosh direktori Tim Kuk 2021-yilda qariyb 100 million AQSh dollar ishlab topdi. Ushbu ma’lumot kompaniyaning AQSh Qimmatli qog‘ozlar va birja komissiyasiga (SEC) yuborilgan hisobotida keltirilgan.

Ma’lumotlarga ko‘ra, Tim Kukning yillik maoshi 3 million AQSh dollarni tashkil etgan, u yana 82,3 million dollarni kompaniya aksiyalari ko‘rinishida olgan. Tim Kuk, shuningdek, Apple’ning moliyaviy va ekologik maqsadlarga erishgani uchun 12 million AQSh dollar bonus olgan. Ta’kidlanishicha, kompaniya rahbarining jami topgan puli 2021-yilda 98,7 million AQSh dollardan ortiqni tashkil qildi.

Ma’lum qilinishicha, Tim Kuk Apple xodimlarining o‘rtacha maoshidan 1447 baravar ko‘p maosh olgan. Apple kompaniyasi xodimlarining o‘rtacha maoshi 68 254 AQSh dollarga teng. Shuningdek, hisobotda Apple o‘z bosh direktorining shaxsiy reyslari uchun 712 ming AQSh dollardan ortiq mablag‘ sarflagani ko‘rsatilgan.

Qayd etilishicha, Tim Kuk 2017-yildan beri samaradorlik va xavfsizlik nuqtai nazaridan rejali tijorat reyslarini to‘xtatgan. Bundan tashqari, Tim Kuk Apple kompaniyasining asoschisi Stiv Jobsdan keyin bosh direktor lavozimini egallaganiga 2021-yilda 10 yil to‘lgan.

“Bu yil Apple uchun ajoyib o‘n yil bo‘ldi. Kuk 2021-yil bosh direktor etib tayinlanganidan beri birinchi marta aksiyalar ko‘rinishida mukofotlandi”, deyiladi xabarda.
Forbes Real-Time reytingiga ko‘ra, Tim Kukning boyligi 1,5 milliard AQSh dollarni tashkil qiladi.

• Apple
• Jahon