O‘zbekistonda 2022-yilning aprel oyida iste’mol bozoridagi inflyatsiya 1,5 foizni tashkil etdi. Bu haqda Davlat statistika qo‘mitasi ma’lum qildi.

Qayd etilishicha, yil boshidan buyon narxlarning o‘sish sur’ati 4,4 foizni tashkil etdi. Yillik nisbatda iste’mol sektorida narxlarning o‘sish sur’ati 10,4 foizga yetdi (2021-yilda 10,7 foiz va 2020-yilda 14,5 foiz edi). Bu ko‘rsatkich mart oyida sal yuqorilagan edi.

Narxlar oshishi bo‘yicha yetakchilik bir oy avval bo‘lgani kabi oziq-ovqat mahsulotlariga tegishli bo‘lib, 2022-yil aprel oyi davomida ularning narxlari o‘rtacha 2,1 foizga oshdi.

Ma’lum bo‘lishicha, aprel oyida oziq-ovqatlardan un 5,2 foizga, sut 2,3 foizga, kungaboqar yog‘i 2,5 foizga, saryog‘ 2,2 foizga, piyoz 10,7 foizga, sabzi 10,1 foizga yuqori darajada qimmatlagan.

Shuningdek, sanoat tovarlari (nooziq ovqat mahsulotlari) narxining o‘sishi oldingi yillardagi ko‘rsatkichlardan ancha yuqori bo‘ldi. Aprel oyida ular 1,4 foizga qimmatladi. 12 oy ichida narxlar 9,3 foizga qimmatlashgan.

Shu bilan birga, maishiy texnika narxlari bir oy ichida 1 foizga va yillik nisbatda 10 foizga qimmatlashdi. Mebellar uchun ushbu ko‘rsatkich tegishli ravishda 1,2 foiz va 8 foizni tashkil etdi. Kiyim va poyabzal narxlari aprelda 1,1 foizga, 12 oy ichida 7 foizga qimmatlagan.

Bundan tashqari, xizmatlar bozorida inflyatsiya aprel oyida 0,5 foizni tashkil qildi.

• Inflyatsiya
• statistika