AQSh Senatida Demokratlar va Respublikachilar 30 yilda ilk marta o‘qotar qurollarni nazorat qilish bo‘yicha qonun loyihasini ishlab chiqishdi. O‘tgan hafta so‘nggida hujjat loyihasini ishlab chiqish paytida yuzaga kelgan qiyinchiliklar haqida xabar berilgan, ammo yakunda hujjat matni ustida ishlash nihoyasiga etkazilgan edi.

Bu haqda xabar bergan Senatdagi demokratlar partiyasi lideri Chak Shumer mazkur hujat loyihasi har ikki partiyaning o‘zaro hamkorligida ishlab chiqilganini maʼlum qilgan.

– Demokratlar va respublikachilarning uzoq muddat olib borgan ishlaridan so‘ng hamkorlikda ushbu qurol nazoratiga oid hujjat loyihasi ishlab chiqildi, – degan u.

Qayd etilishicha, Amerika jamiyatida mamlakatda qurolli zo‘ravonlik tarqalishidan xavotir kuchaymoqda. Yangi qonun loyihasida esa asosiy eʼtibor xaridorning shaxsini qo‘shimcha nazorat qilishga qaratilgan, biroq hujum qurollarini taqiqlash, xaridorlar uchun minimal yoshni 18 yoshdan 21 yoshgacha oshirishni nazarda tutmayapti.

• AQSh
• Loyiha
• Qurol
• Senat