Vashington Seul bilan Shimoliy Koreyaning uchuvchisiz uchoqlarining Janubiy Koreya havo hududiga bostirib kirgani yuzasidan maslahatlashmoqda va uni himoya qilishga sodiqligini ta'kidlamoqda. Bu haqda 27-dekabr kuni Oq uy Milliy xavfsizlik kengashi vakili ma'lum qildi.

“Biz Shimoliy Koreyaning uchuvchisiz uchoqlari harbiy chegara chizig‘i bo‘ylab uchib o‘tgani haqidagi xabarlardan xabardormiz va biz Koreya Respublikasi bilan ushbu bosqinning mohiyatini yaqindan maslahatlashyapmiz”, — dedi u.

U, shuningdek, “AQShning Koreya Respublikasini himoya qilish majburiyatini inkor etib bo‘lmaydi”, deb qo‘shimcha qildi.

Ma’lumot uchun, Shimoliy Koreyaning beshta uchuvchisiz uchog‘i 26-dekabr kuni Janubiy Koreya havo hududiga kirdi. Ularni ushlab turish uchun samolyot va vertolyotlar ko‘tarildi, biroq shunga qaramay, dronlardan biri chegaradan 25 km uzoqlikda joylashgan Seulga uchib, KXDRga qaytdi, yana to‘rttasi radarlardan g‘oyib bo‘ldi va topilmadi. Dronlar Janubiy Koreya havo hududida bir necha soat bo‘lgan. Hodisa Seul aeroportlarida o‘nlab reyslarning to‘xtatilishiga olib keldi. Bundan tashqari, noma’lum sababga ko‘ra, ushlab turish uchun ko‘tarilgan samolyotlardan biri - KA-1 engil hujum samolyoti qulab tushdi.

• AQSh
• Janubiy Koreya
• Shimoliy Koreya