AQSh Davlat departamenti Olmaotadagi bosh konsullik xodimlarining bir qismi va barcha oila a’zolariga Qozog‘istonni tark etishiga ruxsat berdi.

“Davlat departamenti amerikalik davlat xizmatchilari - Olmaotadagi Bosh konsullik xodimlarining muhim vazifalarni hal qilishda ishtirok etmaydigan xodimlari va barcha amerikalik davlat xizmatchilarining oila a’zolari - Olmaotadagi Bosh konsullik xodimlarining iltimosiga ko‘ra mamlakatni tark etishni ma’qulladi”. – deyilgan xabarda.

Shuningdek, AQSh fuqarolariga notinchliklar va koronavirus tarqalishi sababli Qozog‘istonga sayohat qilishni to‘xtatish tavsiya qilingan.

Qozog‘istonda joriy yil 2-yanvar kuni boshlangan umummilliy tartibsizliklar Olmaotadagi infratuzilma va hukumat binolarining ommaviy vayron bo‘lishiga, shuningdek, “namoyishchilar va xavfsizlik kuchlarining katta qismi hibsga olinishi, jarohatlanishi yoki o‘limiga sabab bo‘lganligi qayd etilgan".

Ma’lumotlarga ko‘ra, Qozog‘iston shaharlarida so‘nggi bir necha kun ichida sodir bo‘lgan tartibsizliklar yuzasidan 125 jinoiy ish qo‘zg‘atilgan, politsiyaga 5 mingdan ziyod kishi, jumladan, ko‘plab xorijliklar keltirilgani haqida xabar berilgan. Qozog‘istondagi tartibsizliklar vaqtida yetkazilgan zarar miqdori taxminiy hisobda 212 million AQSh dollarga baholanmoqda.

Ta’kidlanishicha, 9-yanvar kuni ertalab mamlakat rasmiylari Qozog‘istonning barcha hududlarida vaziyat barqarorlashganini ma’lum qildi.

• AQSh
• Qozog‘iston