Joriy yilning 20-may kuni AQSh prezident Jo Bayden o‘z maʼmuriyatida asosiy rahbarlar sifatida ayrim shaxslarni nomzod qilib ko‘rsatish niyatida ekanligini eʼlon qildi.

Bayden mazkur ro‘yxatga Bosh prokuror yordamchisi lavozimiga, AQSh Mudofaa vazirligining xavfsizlik va razvedka bo‘yicha mudofaa vaziri o‘rinbosari lavozimiga, Federal energiyani tartibga solish komissiyasi aʼzoligiga, Tunis Respublikasidagi Favqulodda va Muxtor Elchi lavozimiga hamda O‘zbekiston Respublikasidagi Favqulodda va Muxtor Elchi lavozimiga nomzodlarni kiritgan.

Unga ko‘ra, AQSh rahbari Jo Bayden mamlakatning O‘zbekistondagi navbatdagi elchisi sifatida uzoq yillik tajribaga ega diplomat Jonatan Henik nomzodini ko‘rsatmoqda.

Jonatan Henik ayni paytda tashqi ishlar vaziri maslahatchisi darajasiga ega. Hozirda AQSh Davlat departamenti Milliy mudofaa universitetining Axborot va kibermakon kolleji raisi. Ilgari u Janubiy va Markaziy Osiyo bo‘yicha byuroda Davlat kotibi yordamchisining o‘rinbosari lavozimida ishlagan. U yerda Markaziy Osiyo mamlakatlari, shuningdek, butun Janubiy va Markaziy Osiyoda xalq diplomatiyasi va matbuot uchun masʼul bo‘lgan.

U turli yillarda Turkiyada jamoatchilik bilan aloqalar bo‘yicha vazir-maslahatchi, Timor-Sharqiy missiya boshlig‘i o‘rinbosari va Ozarbayjon, Turkiya, Portugaliya va O‘zbekistonda ham ishlagan.

Nyu-Yorkda tug‘ilgan. Rus, portugal, turk va ozarbayjon tillarini biladi va fan nomzodi darajasiga ega. Gavayi universitetida siyosatshunoslik bo‘yicha bakalavr, Kolumbiya universitetida xalqaro munosabatlar magistri va Kolumbiya universiteti Kolumbiya kollejida bakalavr darajasini olgan.

Tartibga ko‘ra, Jonatan Henik hali elchilikka nomzod sifatida AQSh Senati tasdig‘idan o‘tishi kerak. Henik to‘liq tasdiqlanguncha ayni paytdagi elchi Rozenblum o‘z vazifasida davom etadi.

• AQSh
• Elchixona
• Jonatan Henik
• Rozenblum