AQSh Kongressi vakillari palatasiga Vladimir Putin 2024-yilgi saylovlarda qayta saylansa, uni Rossiya davlat rahbari sifatida tan olmaslik taklifi bilan rezolyutsiya loyihasi kiritildi. Agar rezolyutsiya qabul qilinsa, u tavsiyaviy xarakterga ega bo‘ladi.

Ushbu rezolyutsiya mualliflari Stiv Koen va Jo Uilsonning yozishicha, Vladimir Putin saylovlarni qo‘pol buzish orqali hukumat tepasida o‘tiribdi, uning keyingi faoliyati esa noqonuniy bo‘ladi. Bundan tashqari, 2020-yilgi Konstitutsiyaga kiritilgan o‘zgartirishlar ham Rossiyaning xalqaro majburiyatlarini buzuvchi qonunbuzarlik deb atalgan.

"Vladimir Putinning hozirgi – so‘nggi vakolati 2024-yil 7-mayda  tugagach, hukumat tepasida qolish uchun qilgan har qanday harakati AQSh tomonidan tan olinmasligi lozim" – deyiladi rezolyutsiya loyihasida.

Rossiya federatsiyasining yangilangan Konstitusiyasi 2020-yil iyulida referendum natijalariga ko‘ra qabul qilingandi. Rossiyaning bosh qonuniga tuzatish kiritish tarafdori bo‘lib 77,92 foiz odam ovoz bergan, 21,27 foiz fuqaro esa aksincha, bunga qarshi bo‘lgan.

Joriy yilning 5-aprelida esa Putin Konstitutsiyadagi o‘zgartirishlarga muvofiq saylov qonunchiligini qabul qilish to‘g‘risidagi qonunni imzoladi. Qonun u va Medvedevga yana ikki bor davlat rahbari postiga o‘z nomzodini qo‘yish imkonini beradi. Avvalroq u bunday ish qila olmasdi.

• AQSh
• Rossiya
• Siyosat