AQSh prezidenti Jo Bayden ma’muriyati Ukrainaga “Switchblade” rusumidagi jangovar uchuvchisiz qurilmalar yetkazib berishga qaror qildi.
Qayd etilishicha, Vashington hozirga qadar yuqori aniqlikda nishonga uruvchi bunday dronlarni faqat yaqin ittifoqchisi Buyuk Britaniya bilan baham ko‘rgan.
“Switchblade” dronlari AQSh harbiy havo kuchlari buyurtmasiga ko‘ra "AeroVironment" kompaniyasi tomonidan ishlab chiqariladi. Nishonni 10 kilometrdan aniq uruvchi qurilma faqat bir marta qo‘llangani sabab dron-kamikadze deb ataladi. Shovqinsiz parvoz qiluvchi, kichik hajmli dronlarni payqash mushkul ekani aytiladi. Hozircha 100 dona dron yetkazib berilishi ma’lum qilingan. Keyinroq bu raqam yanada ko‘payishi mumkin.
Ma’lum qilinishicha, Vashington yuqori doiralarida Ukrainaga mazkur ilg‘or jangovar qurilmalarni yetkazish masalasi uzoq muhokama etilgan. Pirovardida og‘ir ahvolda qolgan mamlakatga ko‘mak va xayrixohlik ifodasi o‘laroq uni yetkazishga rozilik berilgan.
Harbiy ekspertlar "Switchblade" dronlarini “aqlli bomba” deb ataydi. Dvigatel, kamera va ichki boshqaruv tizimiga ega qurilma ham bronetexnika, ham piyoda askarlarni mahv etishga mo‘ljallangan. Dronlarni ob’yektlarga mustaqil holda hujum qilishga dasturlashtirish imkoni mavjud.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!