Chorshanba kuni kechqurun kuchli yomg‘ir Nigeriya poytaxti yaqinidagi Suleja shahridagi muassasaga zarar yetkazganidan keyin kamida 118 mahbus qamoqxonadan qochib ketgan. Bu haqda “Reuters” xabar berdi.

Bir necha soat davom etgan yomg‘ir o‘rtacha xavfsizlik darajasidagi qamoqxonaning qismlarini, jumladan devori va uning atrofidagi binolarni vayron qildi, deydi Axloq tuzatish xizmatlari vakili Adamu Duza.

Axloq tuzatish xizmati xodimlari boshqa huquq-tartibot idoralari ko‘magida qochqinlarni qidirmoqda va hozirgacha ulardan faqat o‘n nafarini qo‘lga olishga muvaffaq bo‘lgan.

Duza jamoatchilikni rasmiylar vaziyatdan xabardor ekanligiga ishontirdi.

“Jamoatchilikdan qochib ketayotgan mahbuslarni qidirish va har qanday shubhali harakat haqida eng yaqin xavfsizlik agentligiga xabar berish tavsiya etiladi”, dedi u.

Duza qochqinlarning shaxsini va boshqa tafsilotlari haqida hech qanday ma’lumot bermadi. Biroq “Boko Haram” guruhi a’zolari qamoqxonada jazo muddatini o‘tagani ma’lum.

• Nigeriya
• Qamoqxona