O‘zbekiston erkin iqtisodiyot indeksi bo‘yicha “Erkin savdo” nazorat ko‘rsatkichida o‘z o‘rnini rekord darajada yaxshiladi. Bu haqida Strategik rivojlanish agentligi matbuot xizmati xabar ma’lum qildi.

O‘zbekistonning to‘g‘ri savdo siyosati, tarifli va tarifsiz to‘siqlarning optimizatsiyasi (tarif ko‘rsatkichlarini pasaytirish, bojxona va nazorat to‘siqlarini yengillashtirish) orqali “Erkin savdo” nazorat ko‘rsatkichi 20,2 ballga yaxshilandi. Qayd etilishicha, O‘zbekiston 2021-yildagi 55,4 ballga qaraganda 2022-yilda 75,6 ballni qo‘lga kiritdi.

Shuningdek, O‘zbekiston ushbu reytingda AQSh, Yaponiya, Xitoy va Rossiya singari davlatlarni ortda qoldirgan. Hozirgi kunda mamlakat 2021-yildagi 163-o‘rnidan yuqorilab, 67-o‘ringa ko‘tarilib olgan va bu ko‘rsatkich bilan Markaziy Osiyo davlatlari orasida yetakchilik qilmoqda.

Ta’kidlanishicha, “Erkin savdo” ko‘rsatkichining o‘rtacha bali 70,9 dan 69,5 ga tushgan va 21 foiz davlatlargina tashqi savdoda tariflangan va tarifsiz to‘siqlarni yaxshilashga muvaffaq bo‘lgan.

Ma’lumot o‘rnida aytish joizki, iqtisodiy erkinlik Indeksi (Index of Economic Freedom) – reyting hisoblanib, mamlakatlardagi iqtisodiy erkinlikni baholaydi. Mazkur reyting “Meros fondi” (The Heritage Foundation) AQSh tadqiqotlar markazi va The Wall Street Journal biznes nashri bilan hamkorlikda chop etiladi.

• AQSh
• O‘zbekiston
• Rossiya
• reyting