“AQSh immigratsiya va bojxona politsiyasi (ICE) yakshanba kuni AQSh ma’muriyatining noqonuniy migratsiyaga qarshi choralari doirasida 1179 kishini hibsga oldi”, – deb xabar bermoqda NBC telekanali.

Shundan 566 nafar mahbus AQSh chegarasini noqonuniy kesib o‘tganlikda ayblangan.

Telekanalning ta’kidlashicha, AQSh ma’muriyati ilgari og‘ir jinoyat sodir etgan noqonuniy muhojirlarni hibsga olish va deportatsiya qilishga ko‘proq ahamiyat bermoqda.

Avvalroq, Donald Tramp rasmiylarga noqonuniy muhojirlarning mamlakatning janubiy chegarasini kesib o‘tishiga qarshi choralar ko‘rish to‘g‘risidagi farmonni imzolagan edi. Shuningdek, u 21-yanvar kuni AQShning janubiy chegarasida favqulodda holat e’lon qilish to‘g‘risidagi farmonni ham imzolagan.

Yaqin vaqt oralig‘ida kamida 10 ming amerikalik harbiy xizmatchi va ko‘plab zirhli transport vositalari chegaraga yuborilishi kutilmoqda. Oldinroq esa Meksika chegarasiga 1,5 ming harbiy xizmatchi yuborilgan edi.

Eslatib o‘tamiz, o‘tgan haftada AQSh hukumati Meksika va Gvatemalaga harbiy samolyotlar yordamida noqonuniy muhojirlarni deportatsiya qilishni boshlagan edi.

• AQSh
• Tramp
• muhojir