Dunyo tarixida davlatlarning iqtisodiy tanazzulga uchrashi yoki inflyatsiya holatlari ko‘p bor yuz bergan. Xuddi shunday, bu kabi holatlar hozirgi kunda ham turli mamlakatlarda turli darajada ro‘y bermoqda. Pulning qadrsizlanishi, aynan hozirgi xalqaro vaziyat fonida yana dolzarb mavzuga aylanmoqda.

Hozirda ro‘y berayotgan inqiroz ta’sirida bir qator mamlakatlarda inflyatsiya kuchayib bormoqda. Misol uchun, may oyida O‘zbekistonda yillik inflyatsiya darajasi 11% ga yetdi. 

BMT iqtisodchilarining prognoziga ko‘ra, 2022-yilda hattoki AQSh dollarining inflyatsiya darajasi ham 6,7% ni tashkil qilishi kutilmoqda. Bu AQShda so‘nggi 40 yil ichida kuzatilgan eng yuqori inflyatsiya ko‘rsatkichi hisoblanadi.

AQSh oziq-ovqat do‘konlarida narxlarning oshishi amerikaliklar 1970-yillardagi inqirozdan beri ko‘rmagan darajada tezlashdi.

2021-yilning mayidan 2022-yilning mayigacha ko‘plab mahsulot toifalari bo‘yicha inflyasiya 12 foizni tashkil etdi, deb yozadi CNN axborot agentligi, mamlakat Mehnat vazirligi ma’lumotlariga tayanib.

Narxlarning eng tez ko‘tarilayotgani asosiy tovarlardir, deya qayd etadi telekanal. Tuxum tannarxi huddi shu 12 oyda 32,2 foizga, parranda va baliq mahsulotlari esa 14,2 foizga va sut 11,8 foizga oshdi.

Maqolada aytilishicha, inflyatsiya ma’lumotlari iste’molchilar uchun “uch karra zarba” bo‘ldi. Narxlarning keskin sakrashi nafaqat oziq-ovqat, balki uy-joy va elektr energiyasi uchun ham qayd etilgan.

AQShda kuzatilayotgan ushbu vaziyatga mamlakat fuqarolari va ekspertlar prezident Jo Baydenni sababchi qilib ko‘rsatishmoqda. Hatto AQShning “New York Post” nashri bu haqda “bidenflation” ya’ni “baydening inflyatsiyasi” sarlavhasi ostida maqola ham chop etdi.

Prezident Bayden esa mamlakat iqtisodiyotida kuzatilayotgan inflyatsiya uning “rag‘batlantiruvchi” sarf-xarajatlarini kuchaytirganligi haqidagi tanqidni rad etib, bunda Rossiya prezidenti Vladimir Putinning benzin narxlarini oshirib yuborganligini sabab qilib ko‘rsatgan.

Nima ham derdik, mamlakat iqtisodiyotidagi inflyatsiyaga kim yoki nima sababligini vaqt ko‘rsatadi.

• AQSh
• Bayden
• Inflyatsiya
• Jahon
• Jurnalistika
• Tahlil