AQShda joylashgan “Project C.U.R.E.” xayriya tashkiloti O‘zbekistonning Vashingtondagi elchixonasi ko‘magida Qoraqalpog‘istonga 16,8 tonnali insonparvarlik yuklarini jo‘natdi.

Tibbiy jihozlardan iborat insonparvarlik yuklari iyun oyida Qoraqalpog‘istonga yetib keladi va sog‘liqni saqlash tashkilotlariga topshiriladi. Bu haqda “Dunyo” AA xabar bermoqda.

Elchi Javlon Vahobov tomonidan loyiha prezidenti Duglos Jekson bilan 3 million dollarlik tibbiy asbob-uskunalarini yetkazib berish bo‘yicha ilgari erishilgan kelishuvlar doirasida Orolbo‘yi mintaqasidagi tibbiy jixozlarga eng ko‘p ehtiyoj sezayotgan 24 ta tibbiyot muassasalari ro‘yxati shakllantirilgan.

“Project C.U.R.E.” xayriya tashkilotining xalqaro hukumatlar bilan ishlash bo‘yicha prezidenti Melisa Epostining aytishicha, to‘rtta konteyner AQShdan Yevropaga dengiz orqali jo‘natildi. Amerika tomonining so‘zlariga ko‘ra, yuklar dastlab Gruziyaga olib boriladi, shundan so‘ng quruqlik orqali Nukus shahriga yetkaziladi.

Elchixona maʼlumotlariga ko‘ra, to‘rtta konteynerdan UZI apparati va uskunalari, ventilyatorlar, kislorod konsentratorlari, rentgen skanerlari, yangi tug‘ilgan chaqaloqlar uchun intensiv terapiya inkubatorlari, defibrilatorlar, laboratoriya moslamalari, kislorod ballonlari, bemorlarni tashishga mo‘ljallangan aravachalar, nafas oldirish apparati, jarrohlik stollari uchun to‘shamalar va boshqa tibbiy buyumlar  o‘rin olgan.

“Project C.U.R.E.” nodavlat notijorat tashkiloti 1987-yilda tashkil etilgan bo‘lib, u rivojlanayotgan mamlakatlarga zamonaviy tibbiy asbob-uskunalar yetishmovchiligini bartaraf etishda ko‘mak ko‘rsatadi. NNT AQSHning 6 shtatida o‘zining yirik tarqatish markazlariga ega. Yiliga 40 futlik 200 tadan ortiq konteyner shakllantiriladi. Ularning har birida o‘rtacha 300 ming dollarlik tibbiy asbob-uskunalar jamlanadi. Mazkur xayriya tashkiloti hozirgi kunda jahondagi 135 mamlakatda insonparvarlik loyihalarini amalga oshirib kelmoqda.

2021-yil may oyida Qoraqalpog‘iston shoshilinch tibbiy yordam markazlari “Project C.U.R.E.” loyihasi doirasidagi dastlabki ikkita konteynerdan iborat  insonparvarlik ko‘magini qabul qilib olgan edi.

• AQSh
• Gumanitar yordam
• Qoraqalpog‘iston
• Tibbiyot