“AQShning 22 shtati Trampning tug‘ilganlik huquqi asosida fuqarolik berishni cheklash haqidagi farmoniga qarshi sudga murojaat qildi”, – deya yozmoqda Reuters.

Donald Tramp kecha, 21-yanvar kuni o‘zining prezident sifatidagi birinchi ish kunida tug‘ilganlik huquqi asosida fuqarolik berishni cheklash to‘g‘risidagi farmonni imzolagan edi. Ushbu hujjat kuchga kirganidan keyin 30 kun ichida tug‘ilgan bolalarga nisbatan qo‘llanadi. Ushbu farmonga ko‘ra, cheklov ota-onasi AQSh hududida noqonuniy ravishda yashayotgan bolalarga ham tegishli hisoblanadi.

Demokratik partiya vakillari yetakchiligidagi shtatlar prezident Donald Trampning ushbu qarori ustidan sudga da’vo arizasi berishdi. Sudga da’vo arizasi kiritganlar orasida Vashington, Oregon, Arizona, Illinoys, Nyu-York, Kaliforniya, Kolorado, Konnektikut, Delaver, Gavayi, Men, Merilend, Massachusets, Michigan, Minnesota, Nevada, Nyu-Jersi, Nyu-Meksiko, Shimoliy Karolina, Rod-Aylend, Vermont va Viskonsin singari shtatlar bor.

Sudga taqdim etilgan da’vo arizasiga ko‘ra, prezident Donald Trampning bu qarori AQSh Konstitutsiyasining 1868-yilda ratifikatsiya qilingan 14-tuzatmasiga zid hisoblanadi.

Ma’lumot uchun, Trampning ushbu farmoni ijrosi bo‘yicha Konstitutsiyani o‘zgartirish uchun qonun AQSh Kongressi a’zolarining uchdan ikki qismi tomonidan tasdiqlanishi va mavjud 50 shtatdan 38 tasi tomonidan qonuniy tan olinishi kerak.

• AQSh
• Farmon
• Murojaat
• Sud
• Tramp
• norozilik