Ma’lumotlarga ko‘ra, Asaka tumanida ko‘p yillik manzarali daraxtlarni kesib tashlash holati aniqlangan. Bu haqda Andijon viloyati Ekologiya boshqarmasi matbuot xizmati xabar berdi.  

Ma’lum qilinishicha, Andijon viloyat prokuraturasi, viloyat Milliy gvardiya hamda Ekologiya boshqarmalari xodimlari tomonidan nazorat reyd tadbiri o‘tkazilgan. Tadbir davomida Asaka tumani, “Yangiobod” MFY hududida ko‘p yillik 6 tup chinor daraxti kesilgani aniqlangan.  

O‘tkazilgan surishtiruvlar davomida mazkur chinor daraxtlarini kesish bo‘yicha qonunchilikda belgilangan tartibda tegishli ruxsatnomalar olinmagani, “O‘simlik dunyosini muhofaza qilish va undan foydalanish to‘g‘risida”gi qonun talablari qo‘pol ravishda buzilgani ma’lum bo‘lgan. Chinorlarni kesish orqali o‘simlik dunyosiga 317 mln 50 ming so‘m miqdorida zarar yetkazilgan. 

Holat yuzasidan Andijon viloyat prokuraturasi tomonidan Jinoyat kodeksining tegishli moddalari bilan jinoyat ishi qo‘zg‘atilgan.  

• Andijon
• Ekologiya
• Jinoyat