Afg‘onistonning sobiq prezidenti Ashraf G‘anining aytishicha, u bir yil avval "Tolibon" tomonidan mamlakat prezidentini kamsitib, uni yangi hukumatni qonuniylashtiradigan hujjat imzolashga majburlashiga yo‘l qo‘ymaslik uchun Afg‘onistonni tark etgan.

"Tolibon"  o‘tgan yilning 15-avgustida Kobulga kirib , nihoyat Afg‘onistonni nazorat ostiga oldi. Shundan so‘ng mamlakatni tark etgan G‘ani to‘satdan chiqib ketgani uchun tanqid qilindi.

“Ketishimga sabab, men "Tolibon"  va ularning tarafdorlariga Afg‘oniston prezidentini yana bir bor haqorat qilish va uni hukumatning qonuniyligi haqidagi hujjatga imzo chekishga majbur qilish zavqini berishni istamaganim edi. Men hech qachon qo‘rqmaganman”, – deydi G‘ani CNN telekanaliga bergan intervyusida.

Afg‘oniston sobiq prezidentining so‘zlariga ko‘ra, dastlab u mamlakatni tark etish niyatida bo‘lmagan. Shuningdek, u katta miqdorda pul olib qochib ketgani haqidagi xabarlarni rad etgan.

Ma’lumot uchun, 2021-yil avgust oyi boshida "Tolibon" afg‘on hukumat kuchlariga qarshi hujumni kuchaytirib, 15-avgust kuni Kobulga kirib keldi va ertasi kuni urush tugaganini e’lon qildi. Avgust oyining soʻnggi ikki haftasida AQSh harbiylari himoyasida boʻlgan Kobul aeroportidan Gʻarb fuqarolari va ular bilan hamkorlik qilgan afgʻonlar ommaviy evakuatsiya qilingan edi. 31-avgustga o‘tar kechasi amerikalik harbiylar Kobul aeroportini tark etib, AQShning Afg‘onistondagi qariyb 20 yillik harbiy ishtirokiga yakun yasadi. Afg‘onistonning sobiq rahbari Ashraf G‘ani ham mamlakatdan qochib ketdi.

• Afg‘oniston
• Ashraf G‘ani