NATO Bosh kotibi Yens Stoltenberg Ukrainaga harbiy yordamni kuchaytirishga chaqirdi. Bu haqda Norvegiya korxonalar konfederatsiyasining Osloda bo‘lib o‘tgan yillik konferensiyasi yakunlari bo‘yicha tarqatilgan NATO matbuot xizmati bayonotida aytiladi.

U Ukrainani qo‘shimcha qurollar bilan qo‘llab-quvvatlash muhimligini ta’kidlagan. Alyans bosh kotibiga ko‘ra, qurol-yarog‘ tinchlikka erishishning haqiqiy yo‘lidir.

“Aslida qurol-yarog‘ tinchlikka yo‘l”, deydi Stoltenberg.

Tashkilot bayonotida qayd etilishicha, Stoltenberg “ittifoqchilarning mudofaaga ko‘proq sarmoya kiritishi, avtoritar rejimlarga qaramlikni yo‘qotishi, erkinlik va demokratiya uchun birga turishi zarurligini ta’kidlagan”.

Uning ta’kidlashicha, Rossiya va Ukraina o‘rtasidagi urush tugagan taqdirda ham, NATO va Moskva orasidagi ziddiyat saqlanib qoladi.

“Moskvadagi rejim boshqa Yevropani xohlaydi. Qo‘shni davlatlarni nazorat qilishni istaydi va demokratiya va erkinlikni tahdid deb biladi. Bu Rossiyani G‘arb bilan doimiy ziddiyat holatiga qo‘yadi. Shunday ekan, bu urush tugasa ham, Rossiya bilan munosabatlarimizdagi muammolar saqlanib qolmoqda”,– deydi NATO Bosh kotibi Yens Stoltenberg.

• Bosh kotib
• NATO
• Qurol
• Rossiya
• Ukraina