Avstriyalik jarroh ayol bemorning chap oyog‘ini kesib tashlashi kerak bo‘lgan, ammo operatsiyadan so‘ng uning sog‘lom oyoqni amputatsiya qilgani ma’lum bo‘lgan.

Bemor bo‘lmish 82 yashar erkak joriy yilning may oyida shifoxonaga tushadi. Tibbiy ko‘riklar natijasida uning chap oyog‘i kesib tashlanilishi tayinlangan, biroq jarroh operatsiya oldidan uning o‘ng oyog‘ini kesishga belgilagan. Xato oradan ikki kun o‘tib, bemorning yarasini qayta bog‘lash chog‘idagina oydinlashgan.

Jarrohga nisbatan ayblov qo‘yilib, sud unga 2 700 yevro miqdoridagi jarima chiqargan. U xatoga yo‘l qo‘yganini tan olarkan, "o‘z vazifasiga beparvolik bilan munosabatda bo‘lmaganini" qayd etgan.

Aybdorning advokati sudda mazkur voqea nafaqat jarrohning aybi bilan, balki "nazorat tizimi ishlamagani" boisidan sodir bo‘lganini ilgari surgan.

Xabarda aytilishicha, bemor sudga qadar vafot etgan, jarroh to‘lashi lozim bo‘lgan tovon puli esa uning qarindoshlariga undirib beriladi.

• Avstriya
• Sud
• Tibbiyot