“Toshshahartransxizmat” avtobuslar harakat xavfsizligini nazorat qiluvchi xodimlarga maxsus xizmat mashinalari biriktirilganini e’lon qildi.

Ma’lum qilinishicha, yo‘lovchilarga ko‘rsatilayotgan jamoat transporti xizmati sifatini oshirish hamda avtobus haydovchilarining belgilangan tartib asosida faoliyat yuritishini nazorat qilish maqsadida, “Toshshahartransxizmat”ning 8 ta avtobus saroyi filialida “Harakat xavfsizligini nazorat qilish bo‘limi” tashkil etilgan.

22-yanvar kuni harakat xavfsizligini nazorat qiluvchi xodimlarga o‘z xizmat faoliyatini tezkor va xavfsiz olib borishi, avtobuslar harakatini nazorat qilishi hamda jamoat transporti harakatiga to‘sqinlik qiluvchi omillarni aniqlab, ularni bartaraf qilish choralarini ko‘rish maqsadida, maxsus mayoqchali xizmat avtomashinalari, nur qaytaruvchi nimcha, favqulodda holatni anglatuvchi belgi hamda jezl (tayoqcha) topshirildi.

Ta’kidlanishicha, mazkur avtomashinada xizmat ko‘rsatuvchi xodimlar faqatgina avtobuslar harakatini nazorat qilishi ko‘zda tutilgan.

• Avtobus
• Toshshahartrans