31°
Kechasi 18°
Erondagi norozilik namoyishlari kundan kunga avj olib bormoqda. Ayollar 22 yoshli talaba qiz – Mahsa Aminining oʻlimi ortidan norozilik ramzi sifatida roʻmollarini yechib, sochlarini kesishyapti. Namoyishlar “Ayollar, hayot, ozodlik!” shiori ostida oʻtkazilmoqda. Eron hukumati norozilik namoyishlarini bostirish uchun mamlakatning bir qator hududlarida internetga kirish imkoniyatini cheklab qoʻydi. Gʻarb mamlakatlari talaba qizning oʻlimi uchun Eron hukumatini keskin qoraladi, AQSh Moliya vazirligi esa qizning oʻlimiga aloqador deb hisoblangan harbiylarga qarshi sanksiyalar kiritdi.
Soʻnggi 5 kun ichida Eronning bir qancha shaharlarida norozilik namoyishlarida ishtirok etgan 30 dan ortiq fuqaro halok boʻlgan.
Mahsa Amini oʻtgan hafta Tehronda axloq politsiyasi tomonidan hibsga olingan. Bunga uning sochlarni hijob yoki roʻmol, qoʻl va oyoqlarni keng kiyim bilan oʻrashni talab qiluvchi qonunni buzganlik ayblovi sabab boʻlgan. Qiz hibsga olinganidan keyin oradan 3 kun oʻtib vafot etgan. Oʻlim sababi sifatida “yurak” yetishmovchiligi qayd etilgan, marhumaning qarindoshlari esa uning yuragi bilan bogʻliq hech qanday muammo boʻlmaganini taʼkidlashgan. Qizning oʻlimiga uning politsiya xodimlari tomonidan kaltaklangani sabab boʻlgan deya taxmin qilinmoqda.
Norozilik namoyishlari toʻlqini Eronning 100 dan ortiq shaharlari va 30 dan oshiq viloyatiga tarqaldi. Aksiya ishtirokchilari politsiya va hukumat binolariga oʻt qoʻymoqdalar. Huquq-tartibot idoralari xodimlari esa namoyishchilarga qarshi kurashda koʻz yosh oqizuvchi vositalardan foydalanishyapti, olomonga qarata oʻq uzish holatlari ham kuzatilgan. Norozilik namoyishlarini bostirishga urinish vaqtida 5 nafardan ortiq politsiya xodimi halok boʻlgan.
BMT Eron hukumatini tinch namoyishlar oʻtkazishga ruxsat berish va Mahsa Aminining oʻlimi yuzasidan xolis tergov jarayonini boshlashga chaqirdi. Eron razvedka vazirligi esa norozilik namoyishlarida ishtirok etish qonunga qarshi chiqish ekanligi va barcha namoyishchilarni javobgarlik kutib turganini taʼkidladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
