Asosiy oziq-ovqat mahsulotlari importi va realizatsiyasi uchun qo‘shimcha qiymat solig‘idan (QQS) berilgan imtiyozlar muddati uzaytiriladi.

Oliy Majlis Qonunchilik palatasi deputati Doniyorov G‘aniyevga ko‘ra, Hukumat tomonidan parlamentga mazkur tartibni ifodalovchi yangi qonun loyihasi kiritilishi rejalashtirilgan.

Unga ko‘ra, 2022-yil 30-aprelga qadar quyidagilar QQSdan ozod qilinadi:

– O‘zbekiston Respublikasi hududiga o‘simlik yog‘i, kungaboqar va zig‘ir urug‘i, shuningdek soya danagini olib kirish;

– o‘simlik yog‘ini (paxta yog‘idan tashqari) ishlab chiqarish va (yoki) realizatsiya qilish bo‘yicha aylanma;

– go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olingan mahsulotlarni, kartoshkani hamda muzlatilgan baliqni realizatsiya qilish bo‘yicha aylanma, shuningdek ularni mamlakat hududiga olib kirish.

Maʼlumot uchun, avvalroq joriy yil 1-maydan 31-dekabrgacha bo‘lgan muddatda kungaboqar va soya urug‘lari hamda o‘simlik yog‘i importi, shuningdek o‘simlik yog‘ini ishlab chiqarish va ichki bozorda realizatsiya qilish;

2021-yil 10-oktyabrdan 31-dekabrgacha esa go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olingan mahsulotlarni, kartoshka hamda muzlatilgan baliqni realizatsiya qilish bo‘yicha aylanma, shuningdek ularni O‘zbekiston Respublikasi hududiga olib kirish ham QQSdan ozod qilingan edi.

• Deputat
• Hukumat
• Loyiha