Bugun, 5-avgust kuni minglab odamlar Bangladesh bosh vaziri Shayx Xasinaning “Ganobhaban” qarorgohiga bostirib kirishgan.

Bosh vazir esa iste’foga chiqqanini e’lon qilib, harbiy vertolyotda mamlakatdan qochib ketgan. Bu haqda Reuters xabar berdi.

Qayd etilishicha, u Finlyandiyaga uchib ketishi mumkin. Boshqa ma’lumotlarga ko‘ra, u singlisi bilan Hindistonga uchib ketishi mumkinligi ham aytilgan. Biroq uning qayerda ekanligi hozircha noma’lum.

Ayni vaqtda davlatni kim boshqarayotgani ham ma’lum emas. Shu bois, vaqtincha hukumat tuziladi, bu haqda mamlakatdagi siyosiy partiyalar bilan muzokaralardan keyin armiya shtabi boshlig‘i, general Vakar-uz-Zamon ma’lum qildi.

Ma’lumot uchun, namoyishlar talabalarning hukumat ishlari uchun kvota tizimini tugatishga intilishi bilan boshlandi, biroq politsiya va hukumatparast faollar bilan to‘qnashuvlar zo‘ravonliklarga aylanib ketdi.

Eslatib o‘tamiz, Bangladeshdagi hukumatga qarshi namoyishlarda hozircha 48 kishi halok bo‘ldi.

• Bangladesh