Rossiya Tergov qo‘mitasi raisi Aleksandr Bastrikin mamlakatda o‘lim jazosiga qo‘yilgan moratoriyni bekor qilishga chaqirdi. Uning so‘zlariga ko‘ra, buning uchun Konstitutsiyani o‘zgartirish va referendum o‘tkazish shart emas — prezident Vladimir Putinning farmoni yetarli bo‘ladi.

Bastrikinning fikricha, Rossiyada “og‘ir jinoyatlar soni ortib borayotganini” hisobga olib, o‘lim jazosiga qo‘yilgan moratoriyni olib tashlash kerak. “Bu, birinchi navbatda, iqtisodiy sabablarga ko‘ra amalga oshirilishi kerak, chunki davlat mahbuslarni qamoqda saqlash uchun ko‘p pul sarflashga majbur”, – dedi u.

Bundan tashqari, Bastrikin xalqaro yoshlar huquqiy forumida so‘zlagan nutqida mahbuslar uchun qilinadigan xarajatlarni sanab o‘tdi. Uning so‘zlariga ko‘ra, bitta mahkumni saqlash uchun yiliga kamida 30 ming rubl ketadi.

Bastrikin, shuningdek, o‘lim jazosini qaytarish taklifini insoniylikka intilish bilan izohladi. Shuningdek, u “Menimcha, manyak 70, 80, 100 kishini o‘ldirganida va u eng yuqori jazoga hukm qilinganida, bu juda insoniy qaror bo‘ladi”, — deya xulosa qildi. Crocus City Hall’dagi 145 kishi qurbon bo‘lgan teraktni misol qilib keltirdi.

Rossiyada o‘lim jazosi 1997-yildan beri qo‘llanmaydi.

• O'lim jazosi
• Rossiya