O‘zbekiston Respublikasi tashqi ishlar vaziri Baxtiyor Saidov Minskda Belarus prezidenti Aleksandr Lukashenko bilan uchrashuv o‘tkazdi. Bu haqda TIV matbuot xizmati xabar berdi.

“Bugun Minskda Belarus Prezidenti Aleksandr Lukashenko Janobi Oliylari tomonidan qabul qilinganimizdan mamnunmiz. Belarus rahbariga O‘zbekiston Prezidenti Shavkat Mirziyoyev Janobi Oliylarining samimiy salomlarini yetkazdik. Doʻstlik va oʻzaro hurmatga asoslangan hamkorligimiz kun tartibining barcha jabhalarida jadal rivojlanib bormoqda. O‘zbekiston va Belarus tashqi ishlar vazirliklari oliy darajada erishilgan kelishuvlarni amalga oshirish uchun barcha imkoniyatlarini ishga soladi.”- deyiladi xabarda.

Shuningdek, O‘zbekiston Respublikasi tashqi ishlar vaziri Belarus tashqi ishlar vaziri Sergey Aleynik bilan ham uchrashuv o‘tkazdi.

“Belarus tashqi ishlar vaziri Sergey Aleynik janoblari bilan uchrashishdan mamnunmiz. Bugun Minskda boʻlib oʻtgan muzokaralarimiz rahbarlarimiz oʻrtasida erishilgan kelishuvlar ijrosini batafsil ko‘rib chiqish, shuningdek, aloqalarining barcha yoʻnalishlari boʻyicha fikr almashish uchun yaxshi imkoniyat yaratdi. Munosabatlarimiz ko‘plab sohalarda ijobiy surʼat namoyon etayotganini mamnuniyat bilan taʼkidladik. Ishbilarmon doiralar o‘rtasidagi muloqotni mustahkamlash, iqtisodiy aloqalarni sezilarli darajada kengaytirishga kelishib oldik. Vazirliklarimiz o‘rtasida 2024-2025-yillarga mo‘ljallangan Maslahatlashuvlar dasturini ham imzoladik. TIVdagi hamkasblarimizga samimiy mehmondo‘stlik uchun minnatdorlik bildiramiz”, – degan Baxtiyor Saidov.

• Baxtiyor Saidov
• Belarus
• Lukashenko
• Shavkat Mirziyoyev
• Tashqi ishlar vazirligi