AQSh prezidenti Jo Bayden o‘zining 80 yoshini o‘z oilasi bilan Oq uyda nishonladi.

Oq uy matbuot kotibi Karin Jan-Pyer Jo Bayden o‘z tug‘ilgan kunini joriy yilning 24-noyabriga to‘g‘ri keladigan “Shukronalik kuni” arafasida nishonlashini aytdi. Biroq uning ta’kidlashicha, Amerika yetakchisining nabirasi Naomi King turmushga chiqqani sababli to‘y Oq uyda bo‘lib o‘tgan, butun oila poytaxtda bo‘lgan va ular Baydenning tug‘ilgan kunini birga nishonlashdi.

Jo Bayden davlat rahbari sifatida 80 yoshini nishonlagan mamlakatning birinchi prezidenti bo‘ldi. CNN telekanali manbalariga ko‘ra, to‘y va yubiley sanasi deyarli bir vaqtga to‘g‘ri kelgan, bu tasodifan emas, chunki Amerika rahbari yoshi bilan bog‘liq masalani ko‘tarib, unga e’tibor qaratmoqchi emas.

Ikki hafta avval AQSh tarixidagi eng keksa prezident 2024-yilda davlat rahbari lavozimiga qayta saylanish uchun kurashish rejalari haqida ma’lum qilgan edi.

Shunga qaramay, mahalliy OAVning ta’kidlashicha, Bayden “saylovchilarning yosh haqidagi qo‘rquvidan xalos bo‘lolmadi”: doimiy qo‘pol xatolar, nutqlar paytidagi xatolar va oyog‘i toyib ketishi va hokazo

Qayd etilishicha, u uzoq vaqtdan beri tilga beparvolik va unchalik muvaffaqiyatli bo‘lmagan improvizasiyalarga moyilligi bilan mashhur. Bundan tashqari, 80 yoshli prezident o‘zining ommaviy chiqishlarida ko‘pincha turli xil izohlar va og‘zaki qo‘pol xatolarga yo‘l qo‘yadi, ularni AQShda hazil bilan “baydenizm” deb atashadi, ba’zan iboralarning oxirini yutib yuboradi yoki aralashtirib yuboradi. Ushbu holatlar uning yoshi bilan izohlanadi.

Respublikachilar esa bundan partiyaviy kurashda, jumladan, prezidentning Qo‘shma Shtatlarni boshqarishda davom etishi uchun aqliy va jismoniy qobiliyatlarini shubha ostiga qo‘yish uchun turli xil “baydenizmlar”dan iborat bo‘lgan saylovoldi videolarini doimiy ravishda e’lon qilib borishmoqda.

“The Washington Examiner” “80 yoshingiz muborak, janob Prezident. Iltimos davlat rahbarligiga nomzodingizni qo‘ymang” sarlavhasi bilan bosh maqola chop etdi.

“Uning mamlakatga va o‘ziga berishi mumkin bo‘lgan eng yaxshi sovg‘a bu 2024-yilgi prezidentlikka nomzodini qo‘ymasligidir. U 50 yildan beri hokimiyatda muvaffaqiyatli faoliyat yuritdi. Demokratik partiya usiz yaxshiroq ish qila oladi”, – deyiladi maqolada.

Amerikaning aksariyat nashrlari gerontokratiyadan (qariyalar hokimiyati) xavfsiramoqda.

• AQSh
• Bayden
• Oq uy